關於部落格
文藝天地,歡迎入來打嘴鼓!
  • 12197

    累積人氣

  • 0

    今日人氣

    0

    追蹤人氣

透濫小說氣味e五彩詩篇◎陳金順

 
  以後,台語文學史欲安怎寫我嘸知影?至少,因為先行者宋澤萊e鼓吹,胡長松自2000年以後,棄捨華語文壇e名聲,360度轉向,改用父母話創作文學,即種氣魄,世間少人有。
 
  數念彼段世紀之交e緣會,南北二路聚集台灣新本土社e心志,雖罔《台灣e文藝》五期收煞;嘸過,咱真緊就伐出跤步連成一條台文戰線,《台文戰線》置長松手頭拄編煞第五期;咱茲e戰友仝心肝,即擺嘸那出五期,至少愛做五年。
 
  其實,長松已經出版兩本台語小說集《燈塔下》、《槍聲》。伊寫台語小說,同時嘛勤寫台語詩。就我所知,伊已經寫近百首e台語詩,即陣,長松精選其中三十七首,成做頭一本台語詩集《棋盤街路e城市》。伊用小說家e筆路彩畫詩篇,歸本詩集讀透透,咱會發現這是一本透濫小說氣味e五彩詩篇。
 
  因為出外讀冊e緣故,長松有幾落年離開故鄉高雄。「我時常會值夢中e五福橋頂/看見海鳥e身軀貼近五彩e愛河/翅鼓振動/一直飛深入去」(<值五福橋頂>),五福橋佮愛河是長松少年到旦意愛e所在,伊發現細漢看過e電影「八百壯士」內面e蘇州橋,其實就是五福橋,甚至捌想過五福橋因為安呢增加歲壽兩千冬,落尾伊知影蘇州橋頂,根本看袂著美麗e海港佮海船,這是屬於港都高雄特出e景緻。
 
  棋盤街路e城市,泛勢是台灣任何一個都市e影射,即張地圖存在置咱逐個人徛居e四箍輦轉。對長松來講,棋盤街路e城市,嘸那是無數e十字路口所連接e版圖,閣卡是親情參友情所畫出來e鄉情地圖。「棋盤街路e城市/嘸八出聲表示意見/伊恬恬 坐值海墘/平常看待每一個日出合黃昏/接納眾生,將伊e美麗化身無形」(<棋盤街路e城市>)。
 
  囝仔時e記智,深深椆置長松e腦海裡,茲e畫面嘸是白洴無味e素描,是一幅一幅童年e彩色圖像。大漢了後,長松將記智e底片剪接成詩,tshua7咱倒轉去三十冬前看會著芋園、菱角田e故鄉內惟埤。小學一年彼個薄霧e早起,綠色光線照著媽媽用來pue2目屎,霜凍pit sun5 e手婆。下課時間,學校e紅牆仔邊,看著媽媽包頭巾,置新舖e點仔膠路耙粟仔,「日光蒸起來/遐 一壟一壟e/金黃色e粟仔/親像流動e熱湧 滾絞」(<下課時間>)。我嘸知,當時細漢e長松,心情是嘸是親像滾絞e熱湧?我干單知影,長松透過詩筆重現場景,將伊對媽媽e愛,一幕一幕深深刻劃出來。
 
  長松娶某生子,有一位賢慧e牽手佮一對古錐e後生、查某子。伊參天下間所有做人老父e查甫人仝款,惜子疼子,為怹寫出九首「予囝仔e情歌」。以超音波所歙e第一張大頭相,伊看著囝仔「恬恬值媽媽e腹肚內底/有肥軟膨皮e嘴phoe2,/目睭瞌瞌/嘴唇褫開親像底笑(<第一張大頭相>)。因為空課e緣故,長松定定愛置南北二路飛來飛去,禮拜日暗暝對囝仔講完故事冊上集,隔轉工透早隨愛坐飛鴒機去台北,愛等候拜四才會使講下集,置悲傷佮心悶之間,長松嘸知安怎回應囝仔e問話?「只是思念e目屎,你夢中e面。」(<禮拜日暗暝>)。
 
  長松寫詩予伊e囝仔,同時嘛寫詩予伊徛起e鄉土台灣。伊有誠深e台灣意識,伊詩裡e台灣嘸是烏托邦,有現實e無完滿,嘛有值得一世人走揣e價值。落尾,伊發現咱土地e色緻,存在置咱跤踏過e土佮咱所行過e路頂面。長松捌置深暝聽蕭泰然e音樂受感動,讚嘆伊是音樂e詩人,「你e目睭/是嘸是白雪e異國之夜/彼粒 思念故鄉/e星?」(<夜深,聽蕭泰然>);捌看著八十外歲e阿輝伯踮電視頂唱雨夜花受感動,呵咾「是你向神祈禱/e歌聲」(<我有聽見你唱雨夜花>)。
 
我想,長松對台灣e深情愛戀,會凍以下面即首詩代表:「夜雨e暗暝,/阮輕聲仔向妳下願/台灣,阮選擇妳/嘸是為著過去e傷悲、失去e真理/是為著家厝草花e芳味//為著阮合/阮e兄弟、阮e姊妹、阮e朋友/攏值遮大漢。感謝妳,/賜阮一個有笑聲e囝仔時/賜阮一寡美麗e央望/  一寡人情味/  一寡愛情e穗/閣有果籽鮮甜e四季//道算嘸是永遠e碧海藍天/有人威脅、有人侮辱、有人棄嫌/嘸過台灣,無要緊,阮選擇妳/嘸是因為受氣/嘸是因為堅定e意志/只是阮 嘸願將阮爸母流過e淚/閣送予 阮e子兒//妳看覓咧,/殷e笑容外呢古椎!/殷e夢,是甜蜜e夢//風雨打來e時,/台灣,阮e故鄉,阮選擇妳/感謝妳一路勇健e腳步打拚/賜予阮選擇e權利/阮未驚,阮已經徛起(<台灣,阮選擇妳>)。
 
若講著透濫小說氣味e五彩詩篇,袂用無讀詩集最後彼三首「港口之歌」。<港口日出>、<風甲雨來到港口>、<愛情碼頭e一粒流星>,充滿海湧e波浪、海港e故事佮五彩e色緻。置茲,我無欲tshua7逐家來去港口聽詩人講古,留予讀者家己買一本詩集轉去逗逗仔鼻芳。
 
我映望長松愛繼續寫出互人目睭金e小說,嘛期待未來伊e詩篇會凍愈寫愈有味。
 
──2007.2.25寫置埔姜頭
相簿設定
標籤設定
相簿狀態