關於部落格
文藝天地,歡迎入來打嘴鼓!
  • 12234

    累積人氣

  • 0

    今日人氣

    0

    追蹤人氣

[台語小說]院士e考驗

  道值我專心底進一步研究「四度碎形重湠」e一個早起,A先生竟然親身來夠阮兜敲門。伊提名誌予我e時,我誠實m敢相信。A先生,是吾國碎形幾何藝術e最高院士,嘛是唯一一個通過國際委員會鑑定e藝術家,伊一生e成就是玻璃珠所構成e一座二層樓懸e大型作品,遠遠看去,七彩金光閃熠,予觀者e目睭thi2 be7開;近看,會發現它結構面e精巧幼路,是「七度碎形重湠」e優秀作品,值每一個單元內面鑲入一重小單元結構群,即個小單元結構群e每一個單元續落閣位內面湠,安呢,每一個小單元道閣位更加精巧e內面湠入去,一重湠過一重,總共是七重,結構完整,而且位每一個角度看攏誠有趣味,會使講無任何敗筆,整體看起來,道親像是吸收無數變化值內面e一個小宇宙。假使咱干擔是為著碎形技術e偉大去理解伊,咱會使講A先生是即個時代尚偉大e藝匠,m過事實m-na安呢,當你徛值伊e作品頭前,你慢慢仔看,你會發現故鄉e形象干那出現值你e面前,你若閣斟酌看,囝仔時代e故鄉甚至爸仔母e形影嘛tau5-tau5-a浮現,它tau5-tau5-a成做咱感情e投射,無一下手,咱道會值它e頭前流目屎。這是伊正港了不起e所在。國際委員會予伊e評價是:「值作品裡同時展現上帝創造e偉大奧妙、對全人類e愛、kap鄉土感情e深度,是人類精神成就e重要里程碑。」
  真想be7夠,遮呢受人尊敬e一個藝術家會來夠阮兜揣我,閣卡奇怪e是,伊e表情苦惱,卡細膩看,會感覺伊na beh哭。
  「A先生,大駕光臨寒舍,m知……」
  「值三度重湠e鑑定會,我詳細看過你e作品,你若繼續打拚,應該真有機會,即馬你值四度重湠方面e技術試加安怎?」
  「猶要練習,你看即幾個所在,我m知你咁會使……」我想beh藉即個機會請教伊一個大難關。
  「少年人,真好,加練習真好。」伊安呢講,猶原憂頭結面,看會出來伊無打算beh教我。
  「恕我大膽,先生,你到底有啥物心事?」
  「唉!我先問你,為著碎形幾何藝術,你已經有幾若工無睏啊著否?」
  「是啊。」
  「啊,誠實是甜美e日子啊。」伊e目睭瞇瞇[bui],白色e長嘴鬚頂懸出現一個微笑,隨道閣消失去。
  伊繼續講:「我打算將我e作品毀掉,m過委員會 in m准我。你應該知影,我無法度閣進步啊,我e作品道是安呢。我每一日看見我e作品,我e作品道親像當面底恥笑我,干那底宣布它道是我創作力e尚尾氣仝款。啊,我真欣羨我第一擺完成三度碎形重湠e日子,kap你即馬仝款,充滿活力,有趣味。」
  「先生,請莫安呢講。看你e作品是誠濟人e安慰,而且你e作品是遮呢偉大,一無缺點……」
  「唉,老弟啊,m是無缺點,我給你講,有一個誠大e缺點,要夠你像我安呢e時,你道看會出來。我逐日一想著這,我道睏be7去。」
  「那麼,你安怎打算?」
  「為著彼個缺點,我必須要將我e作品毀掉重做,假使……唉,假使……」
  我想,伊是beh講「假使時間有夠」,m過,伊猶是無講出嘴。
  「所以我想beh聽你e意見。」
  我講:「m管安怎,做一個決定總是著e。你若感覺安呢,道應該將它毀掉。」
  伊哈哈大笑,手貼我e肩胛頭,講:「我道是知影你會安呢講,所以才會來揣你e。老弟啊,這是一個考驗。碎形幾何藝術,是一門團體精神e藝術,嘛是一門面對缺點e藝術,每一個準備beh進入第四度碎形重湠技術e人,基本攏要先瞭解即件代誌。真可惜,你無通過我e考驗,所以我建議你放棄即門藝術。這是為你好。位即馬開始!」
  伊苦惱e表情已經走加無影無跡,即馬換做是我e苦惱,我想beh哭。
  「這無公平。」我對伊抗議。我講:「這無公平,我是為著你才安呢講e。」
  伊真客氣向我告辭,斡身行出阮兜門口。
  「我是為著你才安呢講e!」
  伊無睬我,干擔腳脊胼對我,手輕輕仔揚[iat]一下,無閣講啥物。
  
 
2006/12/4 初稿
 
相簿設定
標籤設定
相簿狀態