關於部落格
文藝天地,歡迎入來打嘴鼓!
  • 12234

    累積人氣

  • 0

    今日人氣

    0

    追蹤人氣

台文戰線第17期


台文戰線 第17號 目次
【社長的話】
行向更加曠闊的文學大道/方耀乾
【編輯室筆記】
生態的文學,文學的生態/胡長松
【第一屆鄭福田生態文學獎拒選落選詩展】
阿立祖匿佇梅花鹿的斑紋中轉來/張德本
心內樹/陳秋白
Siraya生態誌/陳金順
台江內海/陳正雄
流浪者大合唱/施俊州
悲喜牛稠溪/慧 子
陳秋白的公開批/陳秋白
三仙老公仔標的假面/張德本
【文學思路】
時代考驗青年、青年創造時代?:《胡民祥日記:1958-67》專題訪問(下)/胡民祥.施俊州 
【詩】
綠島隨筆/佇馬公睏晝◎林文平
228手護台灣/支那憨神症頭◎蔣為文
冬天ê海灘/予阿嘉/解放總統府◎莫渝
來買彩券哦◎柯柏榮
落葉/美蝶◎莊柏林
寶島走馬燈/往天堂的機票◎陳潔民
白了工◎唐秉輝
車陣/上海ê二二八戰爭◎葉衽榤
車頂的台灣人/腳邊紅葉◎曾貴海
思念這呢厚◎京城
官字二口◎趙迺定
樹公仔/溪水/吵鬧的世間◎李秀
種田人◎高月員
永靖枝仔冰◎陳胤
誠濟人,毋敢入去◎郭文玄
一暝ê雨◎林裕凱
永遠的秋天◎a-hi
【散文】
台文筆會起鼓筆記◎胡長松
嘉南大圳e起造師--八田與一◎張春凰
【小說】
訣別情愛赴劫品◎林央敏
《大港嘴》(6)◎胡長松

 
【台文戰線第17期 編輯室筆記】

生態的文學,文學的生態  /胡長松

國際性的氣候變遷高峰會這個月佇哥本哈根召開,會議主要討論減碳目標,希望各國接續《京都議定書》的精神,會使有新一步的國際共識,毋管最後的結果佮過程的國際政治算盤互相按怎拍,這背後有一个尚基本的意義就是,生態已經是牽涉著人類生命敢會使延續落去的一个無法度避免的問題,而且愈來愈緊急,咱愛共地球位咱家己的手裡搶救轉來。咱嘛會使發見生態的問題根底,時常有政治、歷史、殖民的因素咧牽纏。

佇哥本哈根氣候變遷高峰會前的11月21日,台灣嘛有一个重要的會議佇國立台灣文學館召開,就是台文筆會的成立大會。這個筆會成立的過程,筆者佇這期的一篇文章內面有筆記落來,毋過佇遮對比來論的,是這个會議的精神之一,就是欲團結各界所有台文作家的力量,共台語位殖民者的手裡(甚至位已經異化的家己族群的人的手裡)搶救轉來。母語/母語文學是土地族群文化的具體面,台語的死活當然嘛是嚴肅、緊急的議題。

生態的議題牽涉的是咱身體的活命,母語/母語文學的議題牽涉的是咱靈魂的活命,二項攏真重要。

今年,鄭福田文教基金會舉辦生態文學獎,設台語詩組,按呢的計畫,實在是兼顧咱的身體佮靈魂的活命的真好的代誌,筆者真感佩這款的想法,確實,生態毋是干焦鄭氏基金會背後的太陽能產業愛關心的議題爾,閣較應該是全民的議題,是台語文學家的議題。這是生態的文學,值得咱致重。

另外一方面,咱攏知影,生態體系咧討論生產者佮消費者,生態的問題,濟濟是位尚高層的消費者(人類)無底止剝削低層的生產者所產生的;消費者的生命倚靠生產者,毋過,生產者會使生湠的肥底,suah予消費者過度的欲望糟蹋去,進一步造成消費者本身生命的危機──佇台語文學敢毋是按呢?咱愛斟酌:敢有對實踐、生產台語文學無經驗抑是無誠意的人,當坐佇生態懸層,大範大範咧消費長年參加實踐的台語文學生產者,教示人按怎寫台語按怎用字等等?這是本刊欲提出的非常嚴肅的問題。這是文學的生態,仝款值得咱致重。

所致,鄭福田生態文學獎得獎名單公佈了後,台語詩人陳秋白先生所聲明的拒絕入選公開批,佮陸續佇網路、本刊佮其他刊物發表的議論,我想,就會使佇文學生態這个角度刺激逐家來思考。文學的生態,體現佇各文學獎、文學補助的評審人選、過程、運作制度等等,對台語文學發展的方向,有一定的影響,所有第一線的台語文學「生產者」,袂使欠這款自覺。

《台文戰線》本期所推出的「第一屆鄭福田生態文學獎拒選落選詩展」作品,攏是最後無選入佇得獎作品的詩作,囥佇遮展出,一方面是為著予有意思比較台語「生態的文學」的朋友得著較全面、正確的圖像(該獎得獎作品集已經出版,有興趣者嘛會使佮主辦單位連絡);以筆者的眼光來看,遮的作品咧討論的,已經毋干焦是生態現象的表面,濟濟是針對台灣生態問題背後的殖民歷史這个生態的病根的批判,無全面來讀,對讀者是真可惜的代誌。筆者嘛欲提醒,造成這个台灣生態問題的殖民者佮造成台灣母語流失的殖民者,是仝一群人,阿到今一直毋放棄北京語殖民官話寫作的人(甚至濟濟自稱本土派文學人士),既然看袂清楚,寫作的事實猶是毋願棄絕佮殖民者仝條水,早慢,攏愛面對這个殖民文學生態的歷史。當然,這个專輯嘛是欲提醒所有台語文學的「生產者」:毋管得獎無得獎,台語敢閣有向望,台語文學的逐枝草枝欲按怎佇家己的田園生湠,只有倚靠家己拍拚長,毋是倚靠高層的「消費者」敢欲消費你。

咱做伙加油!

2009/12

相簿設定
標籤設定
相簿狀態