關於部落格
文藝天地,歡迎入來打嘴鼓!
  • 12350

    累積人氣

  • 1

    今日人氣

    0

    追蹤人氣

《台文戰線》大眾文學講座六月場「用母語發現生命中的詩」 筆記

《台文戰線》大眾文學講座第二場邀請著詩人張德本先生,6/20佇大芳文化廣場舉辦,題目是「用母語發現生命中的詩」。五月份就注文好勢的講座,煞抵著六月風颱來鬥鬧熱,過程中閣予人客沃澹,講起來,我這个負責發落的人實在是真失禮;佳哉講者阿本兄(阮攏按呢稱呼伊)並無受影響,伊的演講有感情、有深度,予超市因此成做詩的廣場。

窮實講,怪颱蓮花前一暝佇南海形成的時,我有敲電話予阿本兄,電話中加減有顧慮,不過我考慮風颱猶遐爾遠,閣,有幾個晉前無熟悉的朋友已經透過網路報名,所以就大主大意決定如期舉辦。阿本兄真客氣,嘛順我的意。我是想講,風颱閣遐遠,跤步嘛無hiah緊,極加落寡雨,亭仔跤闊闊,應當好安排。想袂到6/20的日時猶閣好天無雨,暗頭仔遂就開始khau大風,續落,日頭一落山,雨就來矣。位下晡四五點,眾文友陳金順兄、陳正雄兄、柯柏榮兄、施俊州兄、陳建成兄陸續位台南來(暗時涂妙沂姊嘛趕到),高雄在地的林文平兄、陳秋白兄、主角阿本兄佮幾个畫界的朋友嘛到位,閣熟悉無熟悉的朋友十幾个箍倚來,現場沓沓仔鬧熱,阿雨嘛沓沓仔大--起來。風雨暝,予人感動的是,文藝界朋友的熱情原在。節目開始,佇超市的走廊,秋白兄小學二年的古椎後生為逐家奏一曲優雅的Violin,續落我簡單踏一个話頭,阿本兄就正式開講矣。

我愛坦白承認,阿本兄演講的頭前一截我聽無詳細,因為伊tâⁿ起鼓講無偌久,風雨就變面矣,變做絞踅的風甲雨khau入走廊。風甲雨雄雄拍--來,拍佇阿本兄的身軀,毋過伊有力的演講無受影響,無睬風雨佇身上khau削,定在勇者的範勢予人敬佩;風甲雨雄雄拍--來,嘛tshu-tshu拍佇眾人的身軀,共逐个貴賓朋友的衫拍澹去,特別是陳豐惠姊位口面趕來的時,規身軀沃kah澹糊糊假若「落湯雞」,雖罔眾來賓腹腸真闊,注神佇演講無加講話,毋過我看場面按呢,真歹勢,緊請逐家徙位入去超市內面繼續;按呢,才形成這場予人驚奇的「超市大衆文學講座」。佇超市內面演講,效果無通親像佇口面放送的闊閣遠,毋過,因為詩人發聲,予市井之地變身成做詩的廣場,我真受感動。這好定是一个新的紀錄。這遍有幾若个少年輩的新朋友來參與,嘛不時有超市來來去去的人客停跤來聽,我所印的講義,發出去的差不多50份。

阿本兄位伊寫詩將近40年的心内話話起,慷慨開剖伊寫詩的理念佮技術,直直呼籲逐家來講台語,鼓舞逐家來接觸台語文學,前後唸十偌首詩作,有激烈批判的詩比如伊佇1989年所寫的第一首台語詩[龍頭哪會接蛇尾]佮近作的[泅是咱的活海]、[柳丁],嘛有溫柔關照生命感情的作品親像[七日菊]、[蘋果樹],佇尚有效率的時間內予人了解伊的詩藝術,也有硬骨的反抗精神,也有幼路的思想佮感情,實在是真寶貴精采的一場演講。下面是講座過程的紀錄相,請大家參考。

下一回《台文戰線》大眾文學講座,預定佇8/1 19:00~21:00舉辦陳金順兄詩集《一欉文學樹》的新冊發表講座,仝所在,歡迎大家參加。

2009-06-22 佇高雄內惟

 

L1362584 L1362588 L1362600 L1362603 L1362622 L1362624 L1362626 L1362633 L1362638-1 L1362644 L1362647 L1362648 L1362651 L1362670
相簿設定
標籤設定
相簿狀態