關於部落格
文藝天地,歡迎入來打嘴鼓!
  • 12187

    累積人氣

  • 0

    今日人氣

    0

    追蹤人氣

2008台灣文學獎得獎感言

   《金色島嶼之歌》描寫的是台灣平埔族四百年前按怎予殖民者欺騙、分化、消滅的故事,當然,伊是對所有殖民統治的抗議。雖罔即個抗議暫時猶無夠大聲,毋過,伊將記智留落來,這就是初步的成果。所有的殖民統治,攏有殖民者佮被殖民者,阿被殖民者內面閣會夆分化,產生抵抗者佮妥協者的對立矛盾;這就是我所寫的故事。政治經濟殖民是按呢,文化殖民是按呢,語言的殖民嘛是按呢。尤其關係著語言文化殖民,我佇遮欲嚴肅苦勸目前為止,猶無寫無讀過母語文學的台灣文學工作者,毋通繼續做語言殖民者的妥協者,因為無細膩,就會佮殖民語言、殖民文化共條水,民族的記智會留落來,這真歹辯解。逐家唯一會使做的,就是緊來接觸母語文學,猶袂慢。我拄才講,毋通繼續做語言殖民者的妥協者,今年台灣文學獎的長篇小說獎項,陳雷先生的台語長篇小說《鄉史補記》無入圍,我毋知影原因,毋過,以我對文學的見解,《鄉史補記》會使徛佇台灣文學史一个重要的位置,我真想欲請教評審先生對伊無入圍的看法。
  今年熱天,我為著小說《金色島嶼之歌》的創作有一擺短途的旅行,位東港坐船去到金色的小琉球,走揣四百年前予荷蘭人消滅去的Lamey的跤跡──當然,彼日除了烏鬼洞外的一截失真的碑文,我啥物嘛揣無。熱天的溫度真驚人,親像欲共一切的物件融去,包括殖民侵略者的暴行、Lamey人存在過的歷史,閣有咱真無堅定的認知佮信心。有學者推論講Lamey社可能屬佇西拉雅,閣較可能是佮馬卡道有關係,所致,成做文獻中第一個予殖民者消滅的台灣部族,伊的故事就有一定的代表意義。我共伊寫落來,尚重要的是欲共家己講,毋通放袂記,因為殖民者的幽靈好定隨時閣來;特別當咱看見伊透過擴大的警檢權力復辟的tsiàng時,咱愛更加細膩,殖民者壓霸剝削的面腔,大體上是接近的;另外驚人的是,被殖民妥協者的面腔,大體上,嘛是接近的。
  我坐佇Lamey海墘,恬恬看海對面的大武山懸懸tshāi佇海湧之上,日光所tshio̍h的台灣島嶼,青色的山脈遐爾美麗,我的心肝穎仔,一時浮出特別清醒佮溫暖的畫面,就親像為著家己爸母某子祈禱的時所會使感受的生命的江河,充滿位上帝來的愛、平安佮喜樂,恬靜仔流過即個畫面。我共家己講,毋管按怎,咱定著有出頭天的一日,咱定著愛時常為台灣咱的母地來祈禱!
  即篇小說的出現,完全是受著即段時間以來台語文學運動的鼓舞佮牽成,我真感謝國家台灣文學館設立即個有意義的獎項,感謝評審予我的鼓勵,嘛感謝眾文學友志,特別是《台文戰線》的濟濟戰友一路相疼相挺。感謝厝裡的人支持。感謝主,一切榮耀歸予上帝!
 
2008/11/16 佇高雄內惟初寫,12/12增補
相簿設定
標籤設定
相簿狀態