關於部落格
文藝天地,歡迎入來打嘴鼓!
  • 12350

    累積人氣

  • 1

    今日人氣

    0

    追蹤人氣

伊的高雄、親情kah時代――序胡長松《棋盤街路e城市》

今年伊又koh欲出版伊的第一部台語詩集《棋盤街路e城市》,是一本寫予伊khia起的所在―高雄、寫予親情、kah寫予伊的時代的詩集:表現伊對土地的感恩、對親情的愛kah時代的故事。胡長松的詩充滿著南台灣在地的意象,詩中充滿南方的色彩kah聲音,伊是用詩咧畫風景,咧奏音樂的。胡長松的詩毋是以激造語言為本的,是以真情kah思想深度建構起來的。其中有大時代的縮影,親情的牽挽,土地的思戀。
下面我就分做三的部分簡單來tshua逐家作伙來「讀」胡長松的詩,伊的詩是頂面我所講的特色上好的見證。
一、寫予伊khia起的所在―高雄
咱看這首〈棋盤街路e城市〉,胡長松用感情「逼」咱ai以家己khia起的所在做「原點」,行過的所在攏是一個點,劃出「一張地圖」:
 
你值即張地圖出世/你值即張地圖大漢/你哭,你笑/你迎接生命合死亡
 
你發現值仝款e一個城市/咱攏有無仝款e/一張地圖
 
你嘛發現/棋盤街路e城市/嘸八出聲表示意見/伊恬恬 坐值海墘/平常看待每一個日出合黃昏/接納眾生,將伊e美麗化身無形
 
既然這張地圖有你咱的歡喜、苦嘆,按認識論來講,這是真真正正的經驗所建構的生命來源。若講對你跤踏過的所在,無基本的感念,敢講你毋是「行尸走肉」?我想這是胡長松的用意。
值五福橋頂〉書寫伊初中讀冊邊的這條橋--五福橋,透過五福橋咱看見胡長松少年時代的歲月,嘛同時看見被「嫁接」的台灣歷史,五福橋頂的故事才是你咱真正的歷史,真正會予你咱數唸的美麗鄉愁
 
有幾若年e時間我離開故鄉/阿小酒館e音樂聲/道化做我e鄉愁/我時常會值夢中e五福橋頂/看見海鳥e身軀貼近五彩e愛河/翅鼓振動/一直飛深入去
 
二、寫予親情
長松有9首詩是寫予伊的囝的,詩中描寫伊對囝兒的向望kah愛,是台語詩中寫予囝兒真難得的作品。〈第一張大頭相〉是寫予未出世的囝兒的詩,書寫父母的期待的心情,我想每一個父母攏會誠深感受:
 
第一張大頭相/醫生阿伯e超音波/向世間洩露你e面容/你恬恬值媽媽e腹肚內底/有肥軟膨皮e嘴phoe2‚/目睭瞌瞌/嘴唇褫開親像底笑

或者你浸值一個甘甜e夢?
 
你咁是聽到啥物?/是不是耳孔邊有溪水 海湧 合落雨e聲/抑是媽媽飲茶時陣 e 汩漉汩漉?

你咁有聽著她歡喜e心跳?

  逐暝卜睏晉前/對你所講e貼心話?
 
值即個世紀e尚尾e冬天/你卜出世/ 卜離開媽媽溫暖e腹肚/你是不是會嘸甘?/你是不是會哭?/爸爸期待你e哭聲
 
另外這首有時爸爸值夢中〉也是對將近欲來到世間的寶貝囝的期待的詩作,將欲做爸爸的心情表露了真自然,我個人真偏愛:〉也是對將近欲來到世間的寶貝囝的期待的詩作,將欲做爸爸的心情表露了真自然,我個人真偏愛:
  
有時爸爸值夢中/會聽見你親像風鈴仔e笑聲/掛在秋陽e窗邊/爸爸雙手將你夯懸/你柔軟e頭毛/道值旋轉e風中飄動
 
有時是一句二句e歌聲/位你e嘴唇流洩/殷靴呢自然/道親像有蜜蜂採蜜e小花欉/殷幽幽湠開e芳味
 
閣有你e話語/無邪、神秘/--遐咁是你?我e囝仔/值某一個早起/喝喊鳥隻e名字/然後恬恬看殷飛過天邊/向殷/揚手再會?
 
有時爸爸值夢中/耳孔貼著你勻勻仔e心跳/彼時你猶值媽媽e腹肚裡/阿天使,歇在銀河e岸邊/伊e翅鼓/擱(khoe3)在熠熠e天星之間
 
三、寫予時代的故事
胡長松寫予故鄉是用疼惜的心情,伊寫伊的囝是用疼惜的心情,伊寫予伊的時代嘛是用疼惜的心情。咱看〈台灣,阮選擇妳〉:  

夜雨e暗暝/阮輕聲仔向妳下願/台灣,阮選擇妳/嘸是為著過去e傷悲、失去e真理/是為著家厝草花e芳味
 
為著阮合/阮e兄弟、阮e姊妹、阮e朋友/攏值遮大漢。感謝妳,/賜阮一個有笑聲e囝仔時/賜阮一寡美麗e央望/一寡人情味/一寡愛情e穗/閣有果籽鮮甜e四季
 
道算嘸是永遠e碧海藍天/有人威脅、有人侮辱、有人棄嫌/嘸過台灣,無要緊,阮選擇妳/嘸是因為受氣/嘸是因為堅定e意志/只是阮 嘸願將阮爸母流過e淚/閣送予 阮e子兒

對胡長松來講,台灣猶毋是流蜜的迦南之地,伊無失志、怨嘆,伊的向望也tsiah-ni卑微,「只是阮 嘸願將阮爸母流過e淚 / 閣送予 阮e子兒」,所以伊欲拍拚,欲予囝兒一個真正的 Ilha Formosa。到死進前,這也是伊奮鬥的目標,咱看〈值目睭憩起來e時〉:
            
總有這一工,我向望/值我目睭憩起來e時/我e囝仔,會凍徛店我e身邊
給我講:阿爸,請放心/台灣已經是尊嚴e土地/遮有正義e聲,不屈e靈魂/閣有勇敢氣魄e人民
 
有滿滿溫純e愛,無變e約束/閣有體貼堅定e男兒
 
我向望,值我目睭憩起來e時,我向望
 
道值即一工,我e牽手/會凍偎貼值我e心肝邊/親像阮初熟識e/彼一日
 
我講:予我閤一擺為妳唸即首 台灣e詩
 
是四季芳味e田園/咱一世人e感情,一世人e夢
 
咱子子孫孫/永遠卜值遮堅強徛在e/土地e詩
 
對任何一個台文作家來講,是無怨嘆、悲觀的權利。這條路m-tann無掌聲,kan-tann有銃聲。銃聲an四箍輦轉彈過來,自稱愛中國的,欲拍你,自稱愛台灣的,嘛欲拍你。只有謙卑koh堅強的心才e-tang為土地唱出希望的情歌。胡長松的詩予我看著台灣的希望,嘛看著台語文學的希望。
2007/02/20舊曆正月初三透早兩點ti永康
相簿設定
標籤設定
相簿狀態